Moin mitnander,
Um unse Börkumer Platt wiederhen hochtauholden, neugen Theda Akkermann un Gertrud Akkermann-Burmeister einmal in de Maant in’t Toornhuuske.
Dit „Tegen-Avend-Prootje“ steiht immer under ein ander Thema. D’r geiht dat over Seejfahrt, Jagereej, Strandleven, Watertoorn, Museum, Füürwehr un völes mehr. De Vördragen bin immer up Börkumer Platt. Gasten bin uns alltied willkomen, of se blot tauhören of uk wat vördragen wullen. Besünders moij bin dej Vertells van Börkumers um over ein bestimmt Thema tau proten. Ein krass Koppke Tee un ein paar lecker Kaukjes stahn uk up Tafel.
Dej Idee hiertau is tau verseuken unse moije Sprake tau erhollen und wieder tau geven.
Olde Worden, dej in unse moderne Tied nei mehr so faak in’t Gebruuk bin, sulln för’t Vergeeten bewahrt waren. Da bin uk Lü geern geseihn, dej hör Platt noch ein bietje verbeetern wullen.
Dej Avenden bin so gaud ankoomen, datt’t langsam knapp ward mit de Staulen und grooter waard unse Kamer leider uk neij. Daher is van nu an ein Anmeldung nödeg.
Wenn ji Lüst hebben – wi freuen uns up jau Beseuk- meld jau even an bi Theda Akkermann, Tel. 924475 of Gertrud Akkermann-Burmeister, Tel. 7227
Wenn de Corona dat wer tau lett maken wi wieder.
Weest hartlek willkoomen!